•MGA ENTRANTES:

ROY: Bol-anon. 45 anyos nga mag-uumang taga Batuan apan inosenteng gipa-uban sa usa ka NGO aron mag-picket sa usa ka pabrika, picket nga nidayon sa usa ka dispersal, diin nadakpan og nabilanggo.

BOY: Sugbo-anobn. 30 anyos nga trabahante’g inadlaw isip laborer sa merkado sa Cortes apan sa kakuwang sa kita, nang-sideline isip kawatan, snatcher og cellphone.

PULIS: magbalantay sa priso, ang tatay namatay sa hubak kay nakahanggap sa tear-gas atol sa pagpicket sa pantalan sa Tagbilaran.

EKSENA

Sa pagbukas sa tabil, hinay nga mobukas ang suga, makita ang usa ka ngitngit nga bilanggoan sa lungsod sa Cortes, 10 ka kilometro gikan sa Tagbilaran, kansang lungsod nahimutang ang usa ka pabrika sa sin. Buntag sayo, makita sa entablado ang duha ka karsel, ang sa wala nga bahin napaslak ang usa ka bilanggo nga nagsuwat, unya panagsang mobarug, magbahasbahas, dagway’g may halawom nga gihunahuna. Usahay magpanglantaw sa naghukdong nga pulis, gunit sa rehas ug maglingo-lingo. Bakante ang sa tuo nga selda. Sa tunga sa duha ka selda, makita ang usa ka lamesa sa opisina, may mga papel ug folder sa pulis, samtang ang pulis nga nag-bantay sa priso, naghukdong] [madungog usab ang panagsang static ug panag-estoryahay sa radyo sa pulis]

SCENE ONE

Human magsuwat, mobarug na usab si Roy, dagway’g basahon ang sulat samtang madungog ang voice-over]

ROY: VOICE OVER [masulob-on nga tingog samtang moatubang sa tuong kilid sa stage]

Abril 3, 2010

Ondoy,

Sa imong pagkabasa ning suwat, hayan human na ang inyong eksamen. Gikasubo naho nga wa papadala dayo’g kwarta kay apike ta. Ako unang giseguro ang pagpalit og pamatay dangan kay gi-atake ang basakan og army worm. Hinuon, adtoa sila Ate Irish nimo, didto sa opisinahan sa mga NGO nga nag-abag nato sa bukid. Tua koy gipadala nga puwa nga bag niya, tua’y kwarta adto, gamay ra pero ampingi intawon kay gisugal nako ang atong kinabuhi adto. Kon makalugar ka, uli ug timbangi kog abono sa atong luna sa basak sa Tawid. Dia pa ko’y gamayng kabilinggan sa Cortes, apan makauli na ko sa atua sa Batuan ugma.

Imong Tatay

ROY