Sa Kabisay-an ug Mindanao kining tanoma ginganlan ug Kamunggay. Sa Luzon, ilabi na sa Ilokandia ginganlan kini ug Marunggay o Malunggay. Ang kapuslanan ning tanoma alang sa mga tawo, ilabina sa mga kabos dili matupngan.

Sa iningles gihatagan kini ug ngalan nga "Moringa oleifera" diha sa laboratoryo. Usa kini ka tanom kansang mga dahon, bulak ug lubay nga mga bunga, puno sa sustansiya ug bitamina.

Kaniadto ang Kamunggay wala tagda sa katawhan kay lagi utanon sa mga kabus ug gani maulaw man ang mga mutsatsa sa mga adunahan nga mobitbit niini kay lagi kalan-anon man sa mga kabus.

Apan sumala sa mga kasayuran nga nahipos, ang 100 ka gramos nga dahon sa Kamunggay katumbas sa duha ka buok itlog sa manok ug sa usa ka baso nga gatas. Ang usa ka tasa nga dahon sa kamunggay daghan ug Kalsiyom ug bitamina B ug C kon itandi sa ubang utanon sama sa repolyo, petsay ug tangkong. Ang Kamunggay sumala sa pag-analisar niini sa laboratoryo, kini adunay 75 ka kaloris sa kalan-ong enerhiya, 6 ka gramo nga protena, 13 ka gramo nga carbohydrates. Aduna usay niacin thiamin, posporos, ug ascorbic acid. Aduna pa gayoy yero nga ingredients nga gikinahanglan sa mga tawo nga adunay anemia kon nga tawo nga lusparon kay kulang sa dugo.

Gawas sa dahon nga masustansiya aduna pa kini kapuslanan sa natad sa panambal. Ang dahon kon imong dukdukon
maayong itambal sa bag-ong samad kay aduna kini iodo. Aduna usab asido ang Kamunggay nga ginganlan ug methionine
nga maayo itambal sa sakit sa atay. Ang gamot sa Kamunggay kon usapon ug ihampil sa pinaakan sa bitin makasumpo sa paglamay sa laa o kamandag sa bitin. Ang sabaw sa linaga nga gamot maayo itambal sa ubo, hubak, rayuma ug lumbago.